من منطلق واجب

من منطلق واجب وبر ودور
بعبّر شعوري وشعري طير

•••••••

نادر ولو أن الطيور طيور
وفي كل حاجه في صفاته غير

•••••••

يحمل سنينٍ دايره وشهور
وما دار معها وما هوى التدوير

•••••••

رفرف بجنحانه وكوّن سور
بينه وبين اليأس والتكدير

•••••••

قدامه الفرحه وصدق النور
وخلفه نكد يسعى على تدمير

•••••••

مشكور ؟ كلمه ما تبي حنجور
تحتاج قلبٍ صادق وتقدير

•••••••

وبكل ما اؤتيت أنا مشكور
ولا أظنّها تكفي مع التكرير

•••••••

عقلي عجز لا يوصف المبذور
واليا وصف مايجهل التبذير

•••••••

يا والديني ماني بمعذور
بس اعذروني لا حصل تقصير

•••••••

أنتم فرح يبقى وريح زْهور
وانتم أثر أكبر من التأثير

•••••••

يا باب للجنه وشوْف الحور
يا مصدر الخيرات والتبشير

•••••••

عمري وذكري لا بقى مذكور
فدى مواطيكم وغصْب يصير

•••••••

مشاعري تِجاهكم طابور
وشعوري أبعد من مدى التعبير

•••••••

أبقاكم الله فالحياه دْهور
وأثابكم وأعانكم للخير

•••••••••••••••••••••••••••••••••••••••••••••••••

 

عبدالرحيم عبدالعزيز الشيخ

7 تعليق على “من منطلق واجب

متذوق الشعر الحقيقي

صح الله لسانك شاعر متميز وفارق وقصيده غير يكل تفاصيلها … وحفظ الله والديك وجميع المسلمين ورحم الله الميّتين منهم.

ابو سديم

صح لسانك يالشاعر البار
قصيدة بنكهة الكبار
تأخذنا الى منحنى ابداعي مرتفع بالمفردات و مكتسي بكل الجماليات

الله يحفظ والدينا و يسخرنا لبرهم و يحفنا في الدنيا و الاخرة برحماته و بركاته اللهم آمين

ابومشاري

قصيده رائعه عانقت سماء الابداع من جميع النواحي ولايصيغها الا شاعر متمكن

صح لسانك ولله درك ياعبدالرحيم شهادتي فيك مجروحه

تحيتي

غير معروف

فعلا قصيدة مميزة

خالد

صح لسانك واعتلى شانك

فارق فعلاً ومبدع مبدع مبدع الله يحفظك

عواض الصحفي

صح لسانك ياعبدالرحيم
مبدع دائما حفظك الباري ..
ورزقك الله بر والديك .

ابن نويشي

صح لسانك شعر شاعر متذوق للابداع واحساس مرهف بجمال العبارات

اترك تعليقاً

لن يتم نشر عنوان بريدك الإلكتروني.