العمر يمضي وتمضي خطوته للأمام
وبْدايته تنتهي ونْهايته تبتدي
*******
وطبع الليالي تدور وتختبر فـ الانآم
ومصير بعض العرب يا لاش والا اجودي
*******
واللي ينام ويقوم وماله ايّـة مرام
هذا ما ودك تقلّه جعل عمرك مدي
*******
يعيش عمره ما بين المعمعه والزحام
وإن مات حتى عياله فيه ما تقتدي
*******
واللي ما يقدر يروم المجد خله ينام
وإن كان ما هو من حقه فلا يعتدي
*******
أنا تقدمت خطوه واجتنبت الملام
ولاني مفكّر بمن قبلي ومنّ بعدي
*******
أسابق العمر لجل أعيش دون انهزام
وما يأخرّ اسمي سوا ترتيبه الأبجدي
*******
واعنّي أقدام حلمي واتخطّى الغمام
وغصن الطموحات يبقى طول عمره ندي
*******
واقدّر الطيّب اللي له فعولٍ جسام
واعدّه اكبر من حزامي ومن مسندي
*******
والاّ الردي ما نبي منّه سلام وكلام
ما دامت ْخطاه يم الخايبات تعدي
*******
واليا سعيت أبذل جهودي بكل انتظام
وما أسعى لـ شيٍ ما يستاهل عظيم جهدي
*******
والحاجه اللي تنقّص من مقام الكرام
أعوفها لو تجي عندي وتاصل يدي
*******
مشيت في دربي وقلت الهمام الهمام
حتى ولو كان دربي متعب وسرمدي
*******
وحطيت بين الردا والطيب نقطة نظام
وعرفت وجه الرفيق الطيّب امن الردي
******* ******* ******* *******
عبدالرحيم عبدالعزيز سالم الشيخ
@a_abnsalem