مرثية الشيخ عبدالرزاق بن محمد الصحفي (يرحمه الله)

يالله يا واحد عليه اتكالي …. يا ربنا المعبود يا ذا الجلالي

فاول زهور العمر والا فتالي …. رحمتك يالله كم عزيزٍ فقدناه 

 

انت الاله اللي البشر تلتجيله …. وموزع الارزاق ما في مثيله

يوم الخلايق كل جيلٍ بجيله …. رحمتك يالله كم عزيزٍ فقدناه

 

الهاجس اللي له بوادر تدله …. والقلب ما بين الضلوع المطله

يشكون من فرقا الرجال الجبله …. رحمتك يالله كم عزيزٍ فقدناه

 

الموت فرقنا عن اللي نوده …. وداه دارً يا سعد من يعده

واللي يمد الطيب يجزاه مده …. رحمتك يالله كم عزيزٍ فقدناه 

 

الشيخ أبومرزوق ماني بناسيه …. ودمع المحاجر ذاكر اليوم غاليه

تفز له كل الضماير بطاريه …. رحمتك يالله كم عزيزٍ فقدناه 

 

فالعرف مامثله ولااحدٍ يوازيه …. وفالحكم بين الناس ماحدٍ يجاريه

يحكم بشرع الله وكلن يوفيه …. رحمتك يالله كم عزيزٍ فقدناه 

 

ياقف مواقيف الرجال العظيمه …. ولماقفه يا رجال مليون قيمة

ولاهو من أهل الغش ولا النميمه …. رحمتك يالله كم عزيزٍ فقدناه 

  

وفي ساعة المفزاع يبين وقوفه …. مثل الجبل راسي وكلن يشوفه

كفاه ربي من الزمان وصروفه …. رحمتك يالله كم عزيزٍ فقدناه 

 

من اهل الشجاعه والكرم والمروه …. ويكرم الضيفان مشبوب ضوه

هذي صفات اللي على الطيب نوه …. رحمتك يالله كم عزيزٍفقدناه 

  

يالله تسكنه الجنان الفسيحه …. وتمد له مد البصر في ضريحه

ولجنة الفردوس يالله تبيحه …. رحمتك يالله كم عزيزٍ فقدناه 

  

وختامها صلوا على من تشفع …. في امته يوم الخلايق تصفع

نبينا المختار شافع مشفع …. رحمتك يالله كم عزيزٍ فقدناه

 

5 تعليق على “مرثية الشيخ عبدالرزاق بن محمد الصحفي (يرحمه الله)

أم البنين

الله يرحمه ويغفر له ولجميع موتى المسلمين وجزاك الله خير
ولكن ملاحظة لمدير الصحيفة نريد قصائد باللغة العربية الفصحى والتقليل من الشعر العامي

احمدسالم المرامحي الحربي

الله يرحمه ابومرزوق
ويسكنه الفردوس الأعلى من الجنة والله انه فقيده عظيمه في قبيلة الحروب

الاطلال

الله يرحمه و يغفر له ، و صح للسانك أخوي تركي ،

فيصل

صح لسانك

ابوكرم

الله يرحمك يابوي ويوسع قبرك ويجعله روضه من رياض الجنه ويجمعنا معاك فالفردوس الاعلى وبيض الله وجهك ياتركي نعم الرجل انت واهلك واخوانك وربعك ونعم النسب قصيده جزله وام البنين خلينا لك القصيده الفصحى

اترك تعليقاً

لن يتم نشر عنوان بريدك الإلكتروني.