أبدأ بذكر الواحد الحي مـعبود
اللي بذكره يستقيم المقالي
ويالله يارب الملأ خـير موجود
يا منزل القرآن ضرب المثالي
مشيت في خبتٍ وسيعٍ وممدود
حتى اتهيّض بالمثل للرجالي
وجمعت أنا أعواده عودٍ على عود
لجلي باشب النار يرتاح بالي
ودقيت أنا نجري على كل جلمود
وحمست بنٍ فوق سود المقالي
حمسٍ مقنن لا هو بيضٍ ولا سود
أشقر ولونه مثل شمس الزوالي
فنجال سويته على الكيف منشود
والماء أخذته من عدودٍ زلالي
فنجال أخذته عقبه الرأس مقعود
مقعود لأجل يطيع لأهل الكمالي
سلام من ربعٍ لها صدور وورود
ينصى الرجال المكرمين السبالي
سلام من مسروح والوصل معهود
ينصى بني سالم كريمي الفعالي
رديةٍ مثل الحيا ساقه القود
قود الخيال اللي بروقه تلالي
ثم استهل وامطر وحدّر من سنود
سيله مع الوادي تزاحم وسالي
اسقى الديار اللي لها وقت وعهود
حتى ارتوت ثم ربّعت بالمفالي
تحيةٍ لأهل الوفا مطرح الجود
اللي لهم مقدار فالقلب غالي
لأبو عرب وربوعهم مجد مشهود
ولد محمد من قديم وتوالي
قبيلةٍ منّا لها ساس وجدود
والأصل ما يُجحد ولا له جدالي
سالم ومسروحٍ ومن زاد مردود
اسمين منسبنا سواة الجبالي
ميمون ومرّوح على عالي حيود
عيال سالم غيرهم ذا محالي
وزبيد وعمر وعوف وسفران بووكود
ومخلّف وعلي لمسروح عيالي
ستة أساميهم على علم ماكود
والمنبت الطيب على كل جالي
ياحرب ياخيمة ظليلة لها وجود
خيمة كبيرة وضافية بالظلالي
واليوم يا قصرٍ وسيعٍ بلا حدود
ساسه مسيّس والبنا فوق عالي
ربعي تعز الضيف والجار محشود
وزبن الدخيل اليا اشتكى من الليالي
كسّابة الطالة ليا حازت بدود
تبدي كما حيدٍ عسير المنالي
والطيب مكسبها كما العد مارود
وحازت خيار قسومها فكل حالي
قلته وأنا حربي من زبيد معدود
ربعي ياذخري فالرخا والنزالي
وصلوا على خير البشر خير مولود
شفيعنا يوم الليالي الهوالي
عداد مافالكون شاهد ومشهود
يفداه ربعي وكل مالي وحالي
واختم بذكره خالق الكون معبود
اللي بذكره يستقيم المقالي
بسام الصحفي